《愛．回家》「Laptop」親認離隊 孟希璘：估唔到有Bye Bye Buddy嘅一日

處境劇《愛·回家之開心速遞》IT部「Laptop」孟希璘今日喺社交平台宣布離巢，留言話：「bye bye Tvbuddy，估唔到都係比網民快過我講，我都估唔到會有bye bye buddy嘅一日。長氣！慎入！純個人紀念。呢個地方帶畀我8年好珍貴嘅回憶，開心多過唔開心，好多好多，暫別電視機lu~勿念。我仲有一套《死有對証》未出街。」

佢仲拍咗條片同大家分享喺TVB 8年嘅點滴：「話咁快就過咗8年，我第一部拍嘅劇就係《十八年後的終極告白》。」佢感激公司畀機會佢挑戰唔同角色：「公司畀我每一個角色，我都做咗，而且係盡心盡力、全情投入咁去做。」佢特別提到「Laptop」呢個角色最貼近佢本人。

雖然8年嚟未做過主角，但孟希璘話一啲都冇後悔：「不過呢8年我冇白過，因為我享受過每個角色，我享受咗同呢度所有人嘅相處。」佢透露未來將會經營網上頻道，同時繼續做演員：「我以後都唔會放棄演員呢個身份，因為我知道仲有好多人想睇我演戲。」

其實孟希璘大有來頭，佢出身演藝世家，爸爸係著名武術指導兼邵氏演員孟龍，曾經憑《暗戰2》奪得金馬獎「最佳動作設計」。已故資深動作演員孟景海（孟海）係佢二伯父，大姑媽孟秋都係武打演員，所以孟希璘自細就喺邵氏宿舍大，同演藝圈淵源深厚。TVB