流行都市丨龔慈恩剖白40年演藝路 撐女兒入行唔逼唔催：健康最緊要.資深藝人龔慈恩亮相TVB《流行都市》，除咗向觀眾送上「馬年事事亨通、龍馬精神」嘅新春祝福，更暢談超過40年嘅演藝生涯，分享當年無線藝訓班嘅黃金歲月、內地拍《雪山飛狐》嘅經歷，仲大方談及女兒林愷鈴入行嘅態度，通透嘅人生觀同鬆弛嘅育兒理念。

作為香港電視黃金年代嘅代表人物，龔慈恩1984、85年投身無線藝員訓練班，同輩藝人個個志同道合，佢憶述當年：「嗰陣唔知係黃金年代，淨係一群年輕人一齊學嘢，返工時間長又攰，但大家心入面有團火，想將戲做好！仲會直話直說『你呢場戲唔好』，冇彎彎繞繞，嗰種纯粹嘅創作氛圍，而家諗起都開心！」

合約滿5年後，龔慈恩本打算進修演藝學院，卻意外獲得內地古裝劇《雪山飛狐》嘅拍攝機會，呢部劇當年喺CCTV多次重播，成為跨年代經典。佢感恩話：「到而家都有好多細路仔話記得呢部戲，多謝呢個機會，令我嘅演藝路多咗唔少回憶！」入行40餘年，佢直言最幸福嘅係「做緊自己鍾意嘅工作」：「演員最難得係，同對手演得有火花，即時有成就感，呢種快樂好真！」

談及近期動態，龔慈恩透露剛拍完TVB全台藝人參與嘅大劇《璀璨之城》，接落嚟有新廣告合作，仲計劃4月離港拍新戲。雖然女兒已長大，但佢對拍戲熱情不減：「而家先至要多啲拍！拍戲就像同朋友一齊玩，每日開工都好開心，根本唔係辛苦差事！」

至於女兒林愷鈴入行，龔慈恩從不反對，反而以「信任為先」：「佢好有分寸，一開始只接時裝雜誌，完全唔影響讀書，呢個係底線！」佢認為年輕人多積累人生經驗係好事：「多試幾樣嘢，正式入行就唔會太青澀，識得應對各種狀況。」育兒方面，佢堅持「安全前提下放手」：「細個時讓佢試唱歌、跳芭蕾舞，遠遠睇住佢安全，等佢自由發揮，之後再慢慢溝通引導。」

面對演藝圈嘅起起落落，龔慈恩亦俾年輕人建議：「世界好大，唔好執著眼前得失！遇到低谷時，就學新嘢充實自己，學游水、學日文都得，唔好放棄夢想，但要懂得裝備自己，耐心等機會！」

TVB