劉溫馨認同龐景峰分手 強調絕無第三者

藝人劉溫馨聯同李麗霞、漢陽、范明熙、邱晴、三姐蕭秀香，現身醫療中心開幕活動。早前劉溫馨於社交網暗示同男友龐景峰情變，今日佢終於大方認已回復單身。

劉溫馨透露同龐景峰係情人節前分手，實際日子就唔方便公開，今次分手由佢主動提出。佢過年返日本探家人，強調並非為療情傷，又解釋分手原因係性格不合，同第三者完全無關：「係諗得好清楚先決定，真係唔夾，分開對大家都好。」

被問到係咪有好多磨擦，佢話每一對情侶都一定有，亦有開心同美好回憶。提到好掛住前男友隻愛犬Soda仔，佢直言：「好掛，同狗狗有好多美好回憶。」不過現時同龐景峰已經冇聯絡、冇見面，暫時亦冇追求者。

雖然情人節冇情人陪，但劉溫馨話唔會唔開心，會用平常心面對。佢笑指朋友有提過介紹對象，不過暫時未見實際行動，擇偶條件最緊要係有才華、成熟穩重，拍拖一定以結婚為大前提：「一定係，唔會玩玩下，認真戀愛，唔鍾意拍散拖。」被追問是否因此覺得龐景峰唔適合，佢即笑住話：「我冇講過㗎！」又話同林盛斌好熟，不過現階段事業為先。

劉溫馨又自爆參加咗網上真人騷《貼地女神》，希望大家多多投票。比賽要考急才同才華，佢專登為面試排練瑜伽舞：「呢段舞幾有意思，代表放低過去嘅自己，迎接新嘅自己，勇往直前。」

另外，抗癌勇士李麗霞透露現時以中醫同拉筋養生：「之前發覺個人縮咗水，如果唔係做咗咁多手術，都唔會咁警惕，有病之後真係要好好保養。」佢每星期拉筋一次，仲笑稱教練夠靚仔，拉完可以瞓得好啲。

漢陽就自爆近日患上高血壓，要食藥兼節食減肥，習慣睇男醫生，更搞笑講：「有啲嘢唔方便講，好似前列腺問題。」佢又指17歲兒子係手球港隊隊員，有需要都會做物理治療。

范明熙就話準備推出跳唱歌，壓力大到失眠。三姐蕭秀香則指以往腳部問題多多，靠做運動後改善咗好多。