【娛樂新聞】許紹雄離世一周年 AI影片重現訴天上生活.資深藝人「Benz雄」許紹雄離世一周年，今日以AI形式再次喺大家面前出現，分享喺天上嘅新生活。影片中，「Benz雄」分享過往一年嘅感受，並以標誌性親切口吻笑言：「上面班人要我拍段影片返去向大家報個平安」，又感謝觀眾多年來嘅支持，坦言自己過得非常好、每日睡到自然醒，叫大家唔使太過牽掛。

「Benz雄」又向最掛念嘅妻子同囡囡溫情表白，叮囑佢哋要好好照顧自己、唔好輕易生氣損害健康，更心繫家中嘅愛寵Momo，展現佢生前一貫嘅「廿四孝」好丈夫同好爸爸形象。片中亦不乏其幽默樂天嘅金句，笑稱「開開心心係一日，生氣發火亦係一日」，又勉勵大家：「記住，冇過唔到去嘅事，只有過唔去嘅心」。片中仲提到佢發脾氣指做男主角非常忙冇得瞓。

許紹雄去年因癌症引發多重器官機能衰竭不幸病逝，享年76歲。當日噩耗傳出後，全城無一震驚同惋惜，多位圈中好友包括周潤發、苗僑偉以及契女佘詩曼等都悲痛萬分，演藝界與坊間紛紛發文哀悼，感歎香港失去無可替代嘅「金牌綠葉」。許紹雄出身自廣州名門望族，1970年代加入無綫藝員訓練班入行，因早期經常駕駛平治座駕上班，因而獲「Benz雄」綽號。喺超過半世紀演藝生涯中，塑造過無數經典角色，其中《新紮師妹》系列嘅「方中Sir」、《使徒行者》中嘅「歡喜哥」等，一直深受大眾喜愛。

創作影片嘅劉思葭（許紹雄乾女兒）亦於社交平台分享創作心情。佢表示，除最後嘅手機拍攝花絮為實拍外，本影片為AI影像創作，且已取得逝者全部法定親屬、繼承人知情與授權同意，內容僅用於家庭紀念、私人懷念，不作任何商業用途。劉思葭以創意總監身份撰文，指自己八歲認識乾爹，形容對方喺家中冇半分架子。她透露這部短片是走過最漫長、最艱難嘅一段路：「這個劇本，我寫了又改，改了又推翻……我最怕的，是留不住那個我認識的他。」她表示，希望以此作品獻給親友及每一個愛他、念著他的人，「換一種方式，再與他重逢一次」。TVB