無綫小生、小花為本月19日舉行的《萬千星輝賀台慶》拍攝序幕,更移師到九龍灣一條未通車的隧道內拍攝,眾人載歌載舞,當中張振朗、劉穎鏇、朱敏瀚、劉佩玥站在前排位置。現場除了有多部名車,更出動航拍機拍攝,相當大陣仗。
陳曉華與朱敏瀚分手了一段時間,5月時二人曾於樂易玲生日派對中前後腳現身,今次算是分手後正式首次同框,問她有否見到朱敏瀚?她說:「有呀!全世界都見到呀!好多人。(有冇傾偈?)冇呀!因為頭先忙於同跳舞老師排練,跳舞我真係唔在行,我哋6、70人一齊,如果有人跳錯就要重新嚟過,好大壓力,好在未錯過。(之前佢綵排台慶受傷有冇關心吓佢?)我有睇到新聞,知道佢再挑戰成功,犀利!但就冇親口問過。」她又指其中一個鏡頭是羅天宇抱起她,令她回想起之前拍《巾幗梟雄之懸崖》時的一幕,她說:「當時我就重分量少少,佢抱完我之後就喘晒氣,但今次佢抱完之後冇喘氣感覺,只係有少少手痛啫,證明我應該係輕咗。(係咪佢大隻咗咋?)睇落唔覺囉!」說到新劇《驅魔速遞》中吳偉豪跟戴祖儀有激咀戲,問她與周嘉洛有否咀戲時,她笑言:「我有好多打戲同Puppy Love,我主要都係驅魔,到依家見到嘉洛成日都想兜頭踢落去,萬一踢到邊度都唔知點算。」
而之前為台慶表演環節綵排時於兩米高墮地的朱敏瀚受訪時坦言沒事,指所有事都在安全情況下拍攝,導演剪完片指效果不俗,說到陳曉華都有看到他受傷的新聞時,他說:「多謝!發生咗呢件事都唔覺得係咩不幸,不幸中之大幸啦!好多人關心我都好開心,不過就嚇親媽咪同屋企人。」他又指當晚現場表演都會有點驚險,希望可以做到有驚有喜但又安全。
至於《愛.回家之開心速遞》的周嘉洛、吳偉豪及林凱恩齊齊受訪,現時林淑敏及許家傑等人都加入《愛.回家之三代同糖》,問他們有否收到加入邀請?三人表示隨時Ready,周嘉洛指現時拍《三代同糖》的都是強將,笑言:「唔使我哋啦!」間接幫吳偉豪及林凱恩推劇,相當搞笑,但若然真的有機會,他們表示可以接受任何挑戰。提到日前節目巡禮中《驅》劇預告片中,吳偉豪跟與戴祖儀有咀戲時,他表示這是入行以來最激的一次,好新的嘗試,拍攝時更有點尷尬,因為好激動,周嘉洛表示演員拍咀戲時心情不會是享受,因為要好專注和認真。





