【娱乐新闻】朱晨麗首認有圈外對象了解中 陳庭欣自爆後悔冇參加《女神2》：等Bob幫我篩選.導演許鞍華、田啟文、朱晨麗、陳庭欣、邢慧敏、練樂儀、古佩玲及黃建東等，7日晚出席電影《歡迎來龍餐館》香港首映禮。朱晨麗與陳庭欣一同受訪，陳庭欣透露雖然朱晨麗已離開無綫，但兩人仍有朋友群組，間中相約食飯見面：「講吓近況同八卦嘢。」

朱晨麗日前在廣州舉行人生首個個唱，但她否認轉戰當歌手，只視為突破自己的挑戰：「好似上特級班要好快學新嘢，唱歌都難，所以好敬佩歌手。」她透露個唱中獻唱了翻唱歌及未發布的個人國語單曲《你的微笑（暫名）》，是全球首唱：「其實唔係因為巡唱先做呢首歌，只係有機會咪試吓囉，都係啱啱開始，未知用咗幾多錢。」對於網民指她未有代表作歌曲就開騷，她覺得正常：「咁我唔係歌手。努力吓囉，爭取由第一首開始先啦，凡事由零開始。」

談到新工作安排，朱晨麗表示正傾不同範疇的工作，剛離開無綫需要慢慢學習及消化，雖然初期遇上不少困難，但多得身邊朋友幫忙。被問到可有男朋友支援，她坦言有男性朋友幫手：「有曹永廉、崔建邦、個唱嘉賓關楚耀等。」她又自爆經常忘記人名，笑言可能睇手機太多，或者年紀增長導致腦霧。

對於早前被傳婚訊，朱晨麗反問：「連我都唔知喎，呢啲謠言唔好傳，之前都講過有個圈外了解中嘅男性朋友，慢慢發展中，都喜歡嘅，否則唔會去了解，係香港人，但係咪做生意就唔透露咁多啦，朋友介紹嘅，其實都冇乜人知嘅。」

陳庭欣表示不知朱晨麗有圈外發展中朋友，又勸對方應花長時間了解，笑言是過來人：「我就係用好耐時間都未了解到（前度），所以唔使急。」被問到朱晨麗會否介紹筍盤給陳庭欣，朱晨麗直言：「我都掹掹緊喎，大家唔好以為我哋好多人介紹，邊有咁多貨喺身，好多嘢都係隨緣。」

陳庭欣則指無綫戀綜節目《女神配對計劃2》中很多求愛勇者，笑謂後悔沒報名參加，不過男參加者不是太年輕就太年長，相信節目主持人兼金牌媒人林盛斌會暗中幫她篩選：「佢忙啫，冇放棄我，我諗佢忙完節目會再搵我。（心急拍拖？）唔急，難得依家可以做番自己想做嘅嘢，但唔係想玩吓，嚟緊有國際性球賽，望攞到好成績。」

田啟文受訪時表示要向成功的電影取經：「部戲好收得，咪要嚟學吓嘢，收得嘅要學習，唔收得嘅都要學習。」近年內地劇集爆紅，他坦言未有時間研究，反而太太較熱衷煲劇，自爆曾陪太太睇內地劇《蜜語紀》：「尤其朱珠（內地女演員）臉上面有兩個酒粒，又幾得意。」他透露現正嘗試AI短劇的製作方式：「喺度搞緊，諗吓試吓有冇空間。」最近完成電影《天光戲》後，他將再接拍另一套賀歲片，亦想改變戲路，被問到可會嘗試太太喜歡的霸總角色，他笑言：「都可以諗吓，我都好少做。」

許鞍華早前獲第31屆釜山國際電影節「山茶花獎」，她表示：「覺得今次攞比以前高興，因為有少少更加老，就名正言順，頒獎禮嗰日都會出席，因為冇以前咁忙。」談及電影市道差，她認為不應常提「市道差」這三個字：「其實話電影差已經講咗30年，咪一樣有得拍。大氣候冇辦法，但係心態一定可以改變。唔好咁沮喪，要睇有咩題材係拍得，依家電視劇好多，電影要特別題材先吸引到人。」

講到AI熱潮，許鞍華認為科技未必搶到演員飯碗，反而使用恰當能幫助電影製作：「譬如近排有套係AI同真人溝埋嘅電視劇，啲人會好奇去睇，我唔抗拒用AI製作，可以慳錢又係噱頭。」她認為AI製作不能完全取代電影，因為睇電影已成為娛樂節目一部分，面對潮流只能以正面態度應對：「我唔敢講，但係個潮流嚟咗，只可以用正面啲態度去面對，一定有好處嘅。」TVB