【娛樂新聞】甄子丹《殺神》外傳《CAINE》殺到香港取景 天壇大佛大澳蘭桂坊成焦點.動作巨星甄子丹自導自演嘅《殺神John Wick》外傳電影《CAINE》，4月喺歐洲布達佩斯拍攝後，劇組已於6月底抵港取景，預計拍攝至7月。電影將鎖定香港多個地標，交代盲俠「Caine」嘅成長背景。

甄子丹日前被拍到同外籍製作團隊現身大嶼山天壇大佛，呢度預計會係交代Caine身世同東方文化背景嘅核心場景。其他取景地仲包括大澳、堅尼地城、中環蘭桂坊同天星碼頭等。團隊去到大澳水鄉睇景，預計會利用當地棚屋同漁村風貌，營造隱世高手或早期生活嘅懷舊氛圍。甄子丹早前透露，佢喺勘景期間充當導遊，帶外籍團隊深入香港市區進行「文化體驗路線」，又帶佢哋去本地茶餐廳食菠蘿包、蛋撻同港式奶茶。

電影獲香港政府全力協助，劇組希望藉高效率同專業嘅港式動作片規格，展現香港作為「東方荷里活」嘅魅力。另外，美媒報道主演真人版《馴龍記》嘅新生代男星Mason Thames，同老牌男星標尼菲（Bill Nighy）亦會加盟《CAINE》。香港取景加上國際級卡士，令呢部外傳電影備受期待。