【专访】戴祖儀日頭開心果夜晚陷抑鬱 為另一半放棄逞強學做小女人.無綫小花戴祖儀（Joey）向來係身邊好友嘅開心果，但因為過分好強同凡事孭上身嘅性格，令佢獨處時陷入抑鬱，放假都會內疚自責。最近佢頓悟要學識放手同依賴，笑言將來拍拖時誓做被保護嘅「小女人」！

Joey早前憑劇集《飛常日誌II》人氣急升，佢同張馳豪飾演嘅歡喜冤家大受歡迎。作為「前輩」嘅Joey直言曾經喺演戲上畀意見：「佢係英文人，廣東話唔係咁好，講對白好平、好冇感情，我建議佢將講嘢變唱歌，咁會多啲情緒。」劇中Joey經常差遣張馳豪，佢坦言現實中性格獨立，凡事一力承擔：「因為我係長女，以前去外地讀書，由揀學校到住宿舍都係自己安排，就連細佬嚟香港放暑假，我都會幫佢安排實習，朋友有事我會幫佢諗埋一份。」不過最近佢醒覺過分好強並非好事：「好多事情上我都係衝鋒者，將好多嘢孭上身，人前我係開心果性格，但當自己一個人靜落嚟，內在悲傷會散發出嚟。有段時間，放一日假都會內疚，覺得自己唔值得擁有，夜晚會有少少抑鬱，呢啲都係唔健康嘅精神狀態。」

Joey曾為此尋求AI協助：「AI建議學識放手同學識依賴。」朋友嘅一番說話亦點醒咗單身嘅佢，令佢喺愛情上有所反思：「佢話男性天生有保護欲，如果你太好強，兩者關係會疏離少少，所以要學識適當依賴，就可以激發佢哋嘅保護欲。」將來拍拖，佢希望做依賴者角色，現已開始訓練自己主動求助。除咗學識依賴，佢仲慢慢學習將重心放返自身，透露早前開工期間同眾人聊起「愛自己」呢個話題時，一度情緒波動兼眼濕濕，高海寧即送上愛的抱抱，令佢非常窩心。佢有感以往總是優先顧及別人感受，有時為顧全大局而妥協，勉強自己做唔鍾意嘅事，長期忽略自身感受，其實懂得善待自己同樣重要。TVB