邱晴阮政峰開電視新節目教正確運動 阮政峰親認離巢因「唔想抑鬱」

邱晴同阮政峰18日出席開電視節目巡禮，為即將合作嘅新節目《運動關注組》造勢。兩人受訪時話希望透過節目提醒大家運動時姿勢嘅重要性，阮政峰更以過來人身份表示，自己曾經因為忽略熱身同姿勢，受傷後嘅後患比運動當下嘅快樂更大，所以會喺節目教返大眾點樣正確運動。

阮政峰舊年離開效力咗14年嘅TVB，問到真正離巢原因，佢直認係為咗尋求改變：「我之前訪問過一位精神科醫生，佢話有一種人最容易有抑鬱，就係唔改變嘅人。我喺舊公司做咗14年，我覺得我要做一啲改變，試吓唔同嘅嘢，咁我個人就冇咁抑鬱。」

問到係咪做到抑鬱，阮政峰直言：「10幾年喎，唔多唔少都肯定有。」佢仲用餐廳套餐作比喻：「你去一間餐廳，每日都係食A餐，你個人都會冇咁健康。而家我想試吓同唔同單位合作，好似同邱晴合作，幾開心。同埋我做任何決定，身邊朋友同屋企人都好支持。」

另外，邱晴早前喺節目《女行團》嘅水著放題引起網上極大迴響，佢話：「我都估唔到有咁多人關注呢個節目，好開心。」問到比堅尼浸泥漿浴一幕係咪特意向高海寧致敬，邱晴笑住否認：「梗係唔係啦，其實我一開始係冇睇過高海寧嗰個節目㗎，但佢正好多，邊可以比，佢又豐滿又靚女。」

講到拍攝角度會唔會怕醜，邱晴大方回應：「又冇，只係覺得又影得幾靚喎，最緊要影得瘦！我好驚啲『鬼鼠肉』出嚟，好彩角度攞得好。」佢坦言對自己身型冇自信，所以為咗今次拍攝，事前特登去做Gym，慢慢變咗習慣。

對於水著造型被Cap圖瘋傳，邱晴直率分享感受：「原來佢哋鍾意呢個位啊？但其實大家都可以留意我其他嘢嘅。」

邱晴仲透露正籌備舉辦旅遊團，由佢擔任領隊，睇吓有冇觀眾有興趣跟佢一齊去。問到係咪去熱帶地方，佢笑住話：「我想帶大家去啲要著羽絨嘅地方。」記者笑問咁應該冇人去喎，邱晴即話：「滑雪團都幾好啊！」再問入面會唔會著比堅尼，佢爆笑自爆：「我真係試過一次，滑雪嘅時候裡面淨係著sport bra，點知第二日就發燒，所以千祈唔好學！」