《臥底嬌娃》羅毓儀崩潰爆喊搞到網民心都噏 吳子冲親揭「魚帕CP」有吻戲？.《臥底嬌娃》熱播當中，今晚（18日）呢集真係睇到網民心都噏埋！講到羅毓儀飾演嘅童小茹，本來滿心歡喜走去索帕（吳子冲飾）屋企睇貓，點知意外撞到劉彪（關禮傑飾）蒲頭，索帕仲自爆自己就係劉彪個仔，兼講出真名，嚇到小茹成個呆咗！

知道自己夾喺中間左右做人難，小茹離開之後直踩公園「秘密基地」爆喊，想好好發洩吓。之後歐凱（涂毓麟飾）搵到佢，小茹終於忍唔住同佢分享心事：「我今日發現我有個好朋友，佢可能做咗啲壞事，我唔知點算⋯⋯我唔知用咩身份同佢講。」呢場喊戲搞到網民個個都話心痛：「喂呀，唔好BE（悲劇結局）呀」、「小茹今次真係好難做人」、「不過我嘅重點在於，索帕太信任小茹了吧，乜嘢都同佢講嘅？」

好彩有歐凱喺度，用番小茹細個鍾意嘅《使徒行者》嚟開解佢，提醒佢做警察嘅初心：「卓Sir發現郭學華做咗好多壞事，佢都決定大義滅親，將佢繩之以法。」小茹聽完之後，終於鼓起勇氣向沈佳琪（張曦雯飾）同潘奕風（馬貫東飾）坦白劉彪同索帕嘅關係，仲爆埋索帕真正身份，選擇大義滅親！

網民紛紛留言讚好：「雖然好鍾意呢對CP，但堅決抵制戀愛腦，小茹今次做得好」、「TVB嘅女主角一定係好識諗嘅，唔係傻白甜」。不過亦有唔少人可惜「魚帕CP」最終都係冇得開花結果。

不過講到「魚帕CP」嘅最終走向，依然係網民焦點所在。日前有網民殺入吳子冲嘅小紅書留言，話自己係「魚帕CP」忠實粉絲，好想知道佢哋到底有冇吻戲，仲搞笑話：「不用在意林生，佢估計已經過咗接受期。」吳子冲竟然大方回覆：「有...半下」，即時令網民暴動，紛紛表示好期待呢對「最萌身高差CP」嘅吻戲！

TVB