臥底嬌娃｜李海銅馬貫東「盈風」CP甜到漏！親爆男方內向暖男真性情.《臥底嬌娃》呢排播得正熱，尋晚（16日）嗰集講到奕風（馬貫東飾）回想兩年前點樣識嘉盈（李海銅飾），兩人拍拖嘅甜蜜回憶一出，即刻閃盲一眾網民，個個都話佢哋襇到絕！

劇情講到奕風喺洗衣店遇到嘉盈，俾佢把甜美的聲音同溫柔體貼嘅舉動治愈到。後來奕風收數再遇嘉盈，兩人慢慢走近。最感人嗰場莫過於奕風嫲嫲離世，嘉盈不離不棄陪住佢，仲話：「我唔走，以後都唔走，你畀我陪住你啦」真係聽到都心甜。另一場嘉盈喺奕風屋企煮飯，又係「女神光」加秀髮飄逸，難怪奕風冧到暈。

網民紛紛留言讚佢哋合襯：「原來嘉盈嘅麻煩友係佢」、「佢兩個都Sweet喎」、「點解佢哋唔係happy ending」、「睇得出潘奕風好愛佢」。

對於呢股「盈風」熱潮，李海銅接受tvb獨家訪問時話好多謝大家支持。提到首次同馬貫東合作，佢大讚對方好Nice：「我哋第一日開工就係拍靈堂嗰場，阿東好好，佢知我係新人，雖然佢本身比較內向，但都好主動同我傾偈，等我哋可以互相了解。」

李海銅仲爆話馬貫東犧牲休息時間陪佢度橋：「佢作為男主角，每日都要孭住成個rundown，但放工後都願意留低，同我討論第二日嘅場口點樣拍。雖然佢經驗豐富過我，但係佢好尊重我意見，大家一齊拋諗法出嚟，夾一個最好嘅演繹方法。我真係好多謝佢教識我好多嘢。」

佢又話「盈風」呢種係細水長流嘅感覺，平淡但入心：「阿東個角色出面好冷酷，但對住我嘅時候眼神同態度都變得柔和，呢個就係佢細膩嘅演繹，希望大家可以喺我哋嘅場口度感受到。」TVB