【On.cc】蔡思貝有「靠山」　唔愁飯碗博點燈

藝人蔡思貝昨晨出席活動，首度開腔談及離巢TVB的原因，直言並非因為被「雪藏」，只是自己想有新發展。她對於離開娘家大感不捨，透露撰寫感謝文時邊寫邊喊。她暫時未有簽新公司，期盼跟周星馳再合作，對於被指工作不多仍生活富貴，她笑言全賴有父母照顧。

蔡思貝日前在社交網宣布離巢無綫，結束13年賓主關係。她昨晨參加單車慈善活動，是離巢後首次現身公開活動，無綫方面未有派員採訪。思貝透露離巢TVB已有一段時間，當日撰寫感謝文時感觸良多：「寫嘅時候一路喺度喊，細細個乜都唔識，13年後變咗依家嘅我，真係百感交集。」問到公司可有作出挽留？她表示情況就有如子女向父母要求出外留學，她向公司表明想外闖，公司亦贊成，雙方有商有量。談到約滿前一直有傳被「雪藏」，問她是否因沒有拍劇機會，意興闌珊下決定離開？她說：「唔係，我有拍綜藝節目同埋去美國登台，仲解鎖咗我唱歌技能，依家都有學唱歌。同公司唔係不歡而散，日後有機會再合作會隨時候命。」提到她特意點名感謝樂易玲、曾勵珍和曾志偉3人，她解釋：「由我選港姐開始到拍劇同綜藝節目，都係多得佢哋畀機會我，其實仲有好多人幫過我，例如台前幕後好多並肩作戰過嘅人，實在太多人，寫唔晒。」

不排除攻內地市場

問到未來動向，她表示想先淺嘗獨立的感覺，但承認有跟不同單位洽談合作的可能性：「現時呢一刻仲係自僱人士，所以希望朋友呢排唔好叫我請食飯住，最好請我食飯，哈哈！」問到是否準備進軍大銀幕？她坦言是其中一個目標，除了拍電影，也想挑戰舞台劇：「乜嘢工作都想試吓，上年有登台唱歌，不過都有自知之明嘅，努力緊。（向內地發展？）係內外兼備，有好消息再同大家分享。（簽約周星馳公司？）仲有好多可能性……（繼電影《女足》後再同周星馳合作？）佢係我偶像，如果佢覺得我表現良好，希望再搵我，我當然會好開心。」

對於有指她雖然兩年冇工開，但因獲照顧，所以生活依然富貴，她笑指有父母和朋友照顧：「其實咁多年嚟我喺社交平台分享嘅相同片都係喺同一間屋影，一直都係住喺同一個地方。」她自言現時單身，但早前拜年時被親戚追問何時生B，覺得大家可能是擔心生育有年齡限制，她坦言對感情事隨緣，現時希望專注發展事業。另外，提到她早前被拍到坐在花槽旁，單腳踩上行李箱，坐姿怪異，她解釋當時正在拍攝工作照，未察覺到有人在偷拍，指對方在很遠的距離拍攝，加上角度問題，結果把她的腿影得很短。

蔡思貝強調與無綫並非不歡而散，樂意再返娘家。

蔡思貝宣布離巢後首度出席公開活動

蔡思貝大送心心，心情不俗。

拍片向周星馳自薦的蔡思貝，期待對方再邀合作。

周星馳會唔會再搵蔡思貝拍戲呢？

蔡思貝最後擔正的無綫劇集是2023年拍攝的《飛常日誌》。

蔡思貝生活依然富貴，笑指有父母和朋友照顧。

蔡思貝（左）於2013年選港姐入行。

蔡思貝早前被拍到坐在花槽旁，單腳踩上行李箱。