夜王｜葵芳80年代造型撞樣利智？蔡蕙琪親爆妝造原型係呢位港姐亞軍.賀歲片《夜王》雲集譚旻萱、王丹妮、楊偲泳、李芯駖等索女飾演夜總會小姐，個個樣靚身材正，點知網上最搶鏡、討論度爆燈嘅，竟然係造型平平、帶住鄉音又夠曬「娘」嘅「葵芳」！

唔少觀眾一開始以為，飾演葵芳嘅蔡蕙琪本身講嘢就有「譚仔姐姐」口音，點知原來全部都係演技！真人一出聲，廣東話標準到暈，佢之前都話過，口音係專登模仿林明禎。至於「葵芳」個經典80年代造型，到底參照邊位女星，就真係考起唔少網民。

早前有網民出文大讚，葵芳個造型還原80年代味十足，仲話：「佢眼神笑容神韻儀態聲線語速，十足80年代選美佳麗，尤其利智同東華三院總理，同個髮型妝容簡直絕配！」網民瘋狂追問造型原型，竟然真係引到蔡蕙琪親身回應！

蔡蕙琪親自揭曉答案：「其實係參照鄺美雲！當日化妝師係住鄺美雲早年相幫我化妝，只不過化喺我塊面，就產生另一種化學作用咋！」

鄺美雲係1982年港姐亞軍，翻番當年片段，佢當年大波浪曲髮，同「葵芳」簡直如出一轍，連當年流行嘅深色唇妝，蔡蕙琪同化妝師都足本還原，夠曬細心！

網民紛紛留言大讚，蔡蕙琪日常妝同劇中葵芳簡直判若兩人，演技超班：「個髮型化妝冇得頂，你演繹更加無懈可擊，呢個化學作用直接點中好多人笑穴！」「我覺得仲似葉玉卿多啲添！」「最勁係落妝之後完全第二個人，真人靚超多！」

电影夜王