郭珮文呻零追求者決定「出關」覓桃花 倪嘉雯撞名太歲專注搞事業.無綫小花倪嘉雯、郭珮文同埋小生孔德賢，近日齊齊談馬年願望同運程！去年拎埋「最佳女新人」嘅嘉雯，馬年決心周身刀傍身狂增值；至於去年「閉關」避爛桃花嘅珮文，就話要「出關」搵好姻緣，仲自嘲依家完全冇人追！另外，孔德賢為咗出征外地體能賽，正狂操「彭于晏式爆肌」，誓要練出鋼條身形！

圈中人向來信風水命理，呢三位自然都唔例外。生肖屬牛嘅孔德賢，馬年正正犯太歲，所以過年前已經急急腳去攝太歲，只求遠離小人是非，順順利利。而分別屬豬同屬蛇嘅倪嘉雯、郭珮文，原本仲慶幸馬年冇乜大問題，點知嘉雯就有意外發現！

佢透露拍賀年節目時，有師傅話佢個名「雯」字，竟然同馬年太歲「文哲大將軍」同音，都算係犯太歲一種。隔離嘅孔德賢聽到，即時搞笑建議嘉雯同珮文一齊去改名，場面惹笑。

去年台慶憑實力奪得「最佳女新人」，倪嘉雯嘅事業可謂順風順水。展望馬年，佢直言希望爭取更多工作機會，而家主力裝備自己，力求周身刀、張張利：「而家緊學唱歌同打網球，讀書嗰陣已經有唱過歌，趁而家有時間補習吓，希望遲早有機會唱劇集主題曲！」

至於感情事，近年單身嘅嘉雯話完全唔急，皆因有師傅話佢未來幾年姻緣未到，剛好可以疊埋心水搞事業。仲自嘲做慣宅女，根本冇意欲結識新朋友，篤定馬年繼續單身：「屋企人好錫我，根本唔缺愛，而家嘅生活已經好開心！」

同樣係宅女嘅郭珮文，去年因為犯太歲，被師傅批有好多爛桃花。佢笑言當時索性將自己鎖喺屋企，結果真係冇遇到渣男。馬年擺脫犯太歲，佢最大願望就係有好姻緣，仲大呻依家慘遭零追求：「真係冇人追㗎，連私訊都冇一個，可能真係我太宅，好少出去見人啦！」

事業方面，郭珮文去年拍咗內地短劇《為何她們愛上我》，花絮一出已經引起網民熱議，佢直言好期待短劇正式推出，仲希望之後可以再接拍多啲短劇，擴闊自己嘅演藝路。

另外一邊廂，孔德賢趁住暫時冇劇拍嘅空檔，全力為5月嘅外地體能耐力賽做準備。佢話今次操肌同以前完全唔同：「之前做Gym係求練大隻，今次係要練鋼條身形，重點係跑步同體能訓練。目標係操到彭于晏咁，表面睇落好似冇乜嘢，一除衫就有8舊腹肌現形！」

TVB